阿伯好嘢！

  ◆李孝聰

      這次電影節看的電影不多，但整體印象不俗，特別是幾位年紀一大把的阿伯更令我佩服不已，只能說一句：「阿伯，你好嘢！」

      第一個係一向火氣十足的薛尼盧密。老薛早年的十二怒漢（12 Angry Men）、黃金萬兩（Dog Day Afternoon）、急先鋒橫掃罪惡城（Serpico）、電視台風雲（Network）……套套擲地有聲，勁到無倫。最記得電視台風雲中主角怒呼大家一齊將電視機掟落街，真係激到震。他老人家現已八十幾，但功力依然，今次的賊兄弟連環刧（Before the Devil Knows You’re Dead）更添幾分沉鬱，劇力直逼希臘古典悲劇。你可能覺得我講嘢誇張，但正如場刊引述著名影評人Roger Ebert話齋，這部戲觀眾無謂浪費時間看影評，應該立即買票入場，看影評或簡介分分鐘會影響觀影樂趣，問你服未！

      第二個老嘢係堅過石堅嘅堅盧治（Ken Loach）。阿堅哥一向正義，是著名的良心導演，他的政治思想左傾，電影手法平實無花巧，次次兜口兜面兜巴星，對政客、資本家毫不客氣，絕不低頭，從不妥協。據聞風吹麥動（The Wind that Shakes the Barley）即因親愛爾蘭而備受抨擊，但影片刻畫愛爾蘭人的爭取自由，以至最終的兄弟衝突皆使人動容，難怪在康城奪得金棕櫚獎。

      比起以上兩位大哥，得六張幾的馬田史西斯當然係小弟弟，但電光滾石（Shine the Light）係老牌樂隊滾石的紀錄片，幾個人加埋幾百歲，老氣勁揪，係我睇得最high的一部。如果唔話你知這幾個塊面打哂摺嘅老嘢係邊個，你一定以為佢係夏蕙姐的潦倒男友，重應該係啪丸過多果隻，點知佢地幾個一上台就好似上咗身咁，煙視媚行，姣、騷、妖，一字記之曰勁！其實我十年前在巴黎睇過佢地係球場的大騷，當時已經佩服米積加幾十歲人重咁有活力，轉眼十年過去，佢竟然重勁過舊時。全場最深印象係唱As Tears Go By時，原來這麼多年來他們自己竟然沒有正式唱過這首名作。一路聽，一路想起當年的Marianne Faithful。This is the evening of the day……唉！咁又幾十年。

轉載自http://stupidbirdclub-2008.blogspot.hk/post on April 7, 2008(MM)

Monk Muk 寫得精煉，說得傳神，香港地道口語活靈活現；作者講得暢快淋漓，讀著讀著....感覺非常過癮...不能不說句：孝聰老兄，你好嘢！
Candaces Chung 讀到精神爽利，就咁㩒 like 都未得，要開聲讚！李 Sir, 好嘢！