尋常食誌

◆李孝聰
 
       很多朋友說小城變了，不復舊時風味。我不知道大家心目中的風味為何，但在吃方面，我仍然覺得幾好味。

       晨早起來，走到街市旁的粥檔，叫一碗豬紅粥，加碟炒鴛鴦（炒麪加炒河），公雞碗盛的粥大大碗，粉麪山仔咁高，新鮮滾熱辣，米香撲鼻，色香味全。老闆娘問我 使唔使加醬（甜辣任揀或混醬），唔使唔使，因為淨係睇佢兩公婆頂頸，再聽埋街坊的八卦是非已夠味。人家說食嘢要食環境、食氣氛，我同意，這樣的環境氣氛夠 人味。

       食過早餐，飽飽地，最好莫過於上松山行個圈，這裏是我的其中一個小城之選，可以三百六十度環迴觀看小城風光，秋風舒爽，心曠神怡可不單是教科書中的四字詞 呢。不喜歡行的可以選擇到盧生公園坐吓，聽聽大叔大嬸唱粵曲，缺點係老人較多，坐着坐着會想起許鞍華的姨媽的後現代生活，觸景生情，都係走人。

       未想吃飯可以到鄭家大屋逛逛，溫習一下鄭觀應的盛世危言。午餐我喜歡去市中心土土地的小咖啡館，短短的斜路過濾了遊客，所以雖與繁華之地僅幾十步距離卻不覺喧鬧。套餐幾十皮一客，有湯有茶。特別推薦咖哩牛腩飯，那些牛筋彷彿仍有生命，咬一口，它在你口中頑抗，係 咁彈吓彈吓，餘震感人，我唯有虔敬地細心咀嚼，誠意趙之。飯後一杯啡，據店中海報說可使你“Do stupid things faster with more energy. ”雖是小店，伙計江哥仍然一絲不苟，每次都會先將杯和奶加熱。一次一位熟客入座，閒聊下，江哥問他為何久不見面，客答心臟病才剛康復。江哥聞言不語，卻默 默將桌上咖啡糖換上代糖，細心如此，問你服未。

       飯後甜品可以出街尋食。我最愛去橫巷食蛋，貪佢細細隻，不飽肚。焦糖燉蛋原殼上，用小匙敲裂面層焦糖，入口，以齒尖小咬，有微微碎裂聲，焦糖輕甜，蛋香濃，令人陶醉。幾啖食完，意猶未盡？千祈忍住，保留這種感覺便最好。

       下午去邊？大部分人既來到賭城自然有計，我的另類之選是看電影。那天恰好有幾小時空檔，行過大會堂就順便一看。售票處的阿姐以紅藍鉛筆在大座位表上畫位， 入場，阿叔帶位：「你坐依行啦。」由於事先完全不知道電影的資料，看了一會才發現是講亨特和羅達的真人真事，電影出奇好睇，寫兩個賽車手的微妙關係絲絲入 扣。完場開燈，原來全場得兩個人，後面的大隻佬豎起兩隻手指望住我笑，我俾佢一個五，然後一齊在電影音樂中以賽車雙雄的姿態步出戲院。五十蚊包場，抵到 爛。

       下午茶時間，近近地行上小山崗精緻咖啡店飲杯Double espresso。小店佈置簡約清新，咖啡香濃，坐在大玻璃窗前，靜看充滿歐陸風情的小廣場，真舒服。

       晚飯呢。食葡餐可以過對面海，不必查書，求其搵間乜度、乜奴之類的普通裝修餐廳即可，如果掛滿波圖的旗和波衫的更好，通常好食，價錢合理。食中餐一樣，我 最鍾意去D乜記物記，個名愈老土愈好。我本來對毛記果個個頭蠟到令過馬英九，條界分到分明過何博士大馬路的阿哥冇乜好感，覺得他流裏流氣信唔過，豈料那次 他見我一個人，話：「你一個人唔好叫斑啦，今日有撻沙，蒸番條，炒碟菜咪夠囉。」嘩，撻沙滑一滑，平夾靚，幾乎骨都食埋。真係人不可以貌相，慚愧慚愧。

       食到這個地步，應該停了吧，但老友電車嵐話阿乜記的布拉腸粉好正。那次本來想試，但坐下見到一個金髮碧眼的鬼佬進來，開口話整兩碗魚雲粥行街，吓？咁識食？一於試下，果然好嘢。魚粥鮮甜，無假味。鄰桌的鮑汁糯米雞又好似好好味，但都係忍住，如若不然真的會飽到發惡夢。

       食足一日，肚滿腸肥，身心飽足。朋友話乜你浄係去埋哂D橫街窄巷食CHEAP嘢。係呀，我就是喜歡這種平平常常的味道，在尋常飲食中認識一個地方。這就是我的米芝蓮。

原載http://stupidbirdclub-2008.blogspot.hk/ posted on 2013-10-18
(MM)

Kam Tim Ling 聰哥順手拈來，亦文亦白，寫得咁生鬼，介紹得咁正，真係想即刻跟住路線圖過小城去飽餐一頓；但要在「金風舒爽，心曠神怡」的秋天去，恐怕要待在下退休後矣。
Lee How Chung 如果你則還可加一節目，按詩索驥遊，循也斯詩蹤遊街，甚正。
Constance Ma 不竟五年下來，祝願小城依舊。現在相約諸位，明年小城走一躺。
Miu Siu Yuen 寫得如斯吸引,是作者一天的際遇難得,還是愉悅的心境可貴?
Monk Muk 浮生一日閒遊小城，那麽豐盛，食足六餐之餘，其間行街市聽八卦是非、坐公園聽粵曲、無意中包起間影院看賽車.....，細意品嚐平常市井人情味....﹔作為讀者，彷彿也真切地品嚐到那人間滋味........，是另類米芝蓮之旅。