焦慮

◆肯肯

      胡思亂想，自己嚇自己，疑神疑鬼，愈想愈似，膽破心驚，魂飛魄散，行唔安坐唔樂。

      又乜事呀？

      一樣米食百樣人。其中有人，聽到遠雷啫，哪會臨到頭上，吹散屋瓦，水浸廳堂？驚都未驚過，晚飯宵夜直落大被冚過頭。另外有人，遠方有戰爭，立即屯米上倉，油缸入滿；新聞又有失蹤婦孺，立即下令禁足。神經繃繃緊，冇啖好食。

      請勿標籤我倆。提心吊膽，what is fear but fear itself?

      這回，她首次夜更餐廳服務，連續九日，兩點至午夜，執完手尾地鐵已停駛。等稀疏夜巴士，紫色三層？魔杖傍身？半夜三更，黑麻麻，靜嚶嚶，一個女仔。餐廳女經理問，咁細個做乜唔讀書你幾多歲呀做乜要做份咁辛苦工時咁長嘅工呢。幾個人問，夠唔夠十八歲。

      焦慮無由。

      那父親吩咐，到家只需短訊嗨報平安，免我們擔掛。可是她學會西洋規矩，有人在旁不接電話，開工不接電話，懂禮貌有修養，但忙呀累呢連影都冇，傷害只因親近。首更當夜，那個父親輾轉反側，翌日沒有話別便出了門，恐怕他自己也不察覺。遠離塵囂鄉居久了，忘記首都繁華不夜天，夜班巴士路上行人擠逼如晝。呢度係倫敦嚟㗎咪擔心喇。

      我知，我知。逆地而處，設身處地，你還會不會深明大義語重心長勸說，快快解放圍裙帶吧。咁都好擔心？人家空檔年背包非洲流浪言語不通還不是冇穿冇爛。

      焦慮同你講道理咩。

      她一定得遺傳了。焦慮做不到最好。試用期，這麼多對眼睛𥄫住表現，誠惶誠恐，擔心呢樣擔心嗰樣，手捧一盤朱古力，在行政總廚主廚副廚面前滑手，整個早上的心機功夫瀉滿地，大家目瞪口呆，主廚反應快，速速安撫，「不哭不哭。不過是一盤朱古力，不是世界末日，沒塌天，沒要緊沒要緊，沒有大不了」。

      「經常焦慮的人是廚房外面的煙卣，旁邊人遠遠看見都忙著拐彎走了」。

原載http://cancancl.wordpress.com/ posted on 2013-12-07 --(MM)

Victor Hui 兩岸猿聲啼不住，輕舟已過萬重山。
Candaces Chung Phew! (揮汗）
Miu Siu Yuen 身為母親的焦慮,肯肯寫得深刻,不過,自己也要放下,放鬆呵!
Candaces Chung 知道喇。可以坐低寫出來，即係唔再坐立不安，係咪？